Tag der Jugend 20.07.2010
Siehe separater Bericht

Eröffnungsschiessen 19.07.2010
Siehe separater Bericht

Friitig 25.06.2010 (Motto: Jetzt geht’s los)

Am Morge esch es scho früeh losgange, mer hei uf die 6i abgmacht im Schuelhus Wiige, bes uf es paar wenigi, wo entweder abghout worde si oder diräkt cho si. Zersch hetts gheisse ab id Plombage. Esch chli es dröck u es gstoss gsi, aber trotz auem hend aui eri Sportgrät chönne plombiere.

Denn hetts gheisse Läger bezie. Hend aui eres Plätzli becho u hend afo chönne schiesse. Es send aui me oder weniger guet gstartet. De Stand zRupperswil hett ömu de Wiiger-Schötze glöck brocht am Friitig. Es hett gueti Resultat gäh u es si
aui me oder weniger zfrede hei.

De Roger u de Hämpu si zBuchs go dMeischterschaft schiesse. Si si de später zo eus uf Rupperswil is Fäschtzentrum cho met üüs cho zMettag ässe. De Roger hett e super gueti Meischterschaft gschosse met 519, a dere Stöu härzlichi Gratulation. Am Hanspeter hetts leider wäge eim Ponkt ned för die grossi Meischterschaft glänget, aber debii si esch aues! Ou am Hämpu gratulation för di chliini Meisterschaft.

Am Obe send die meischte no rasch eis go zie i Schlossbärg om dä Tag ou no rechtig abzschliesse met de Schötzekollege.

Sonntig, 04.07.2010 (Motto: Sektion)

Am Sonntig esch es sehr früeh losgange, vorauem för üsi Jongmannschaft; es hend ned ganz aui zor Ziit ufmöge. Aber letschtändlech hemmer die ganz Mannschaft zäme gha u si rechtig Rupperswil ufbroche. Mer hei ou no öpper vo Richethau debii gha, dClaudia hett leider met erere Sektion ned chönne go, us demm Grond hett si sech üs agschlosse u esch ganz zfrede gsi. Zersch hetts weder gheisse plombiere, för die einte vo üs esch es s’erschte mou gsi wo si so öppis gmacht hend. Denn esch es weder ab gange is Schiesszäut zRuppi.

Nach afänglechem dorenand met de Warner hett de aues klappet. Es esch gloufe we am Schnüerli, üsi Jongmannschaft hett super gschosse. Si hei afe rächt vorgleit ir Sektion, dass die „aute Hase“ scho bau chli müesse gas gäh.

De Göpfi esch speziell zerwähne, är schiesst lieber 100 i de Steche aus im Nodoppu!

De Roger, Hämpu, Werner, Titus, Silvia,ond de Tinu hei uf em Zäutplatz öbernachtet. Chli müed hend si scho usgseh, die meischte hend jo dörfe betreue, de esch es ned so tragisch gsi.

dSektion esch de nächhär hei. U mini Wenigkeit esch de no de Omzog go luege. Esch ganz e glongni Sach gsi u jedem zEmpfähle wenn er dMöglechkeit hett go zluege!

Friitig, 09.07.2010 (Motto: Nochedopple)

U scho weder früeh uf, u das amene Friiti wemmer frei hett. Ganz ehrlech, beni gärn uf. Es esch bes zo demm Ziitponkt aues super gloufe u es esch emmer e gueti Stemmig gsi.

Esch ned aune so guet gloufe a däm Friitig. Aber es hett be de einte oder andere doch no öppe e Mouche gäh för i Nodoppu u anderi schiesse si i de Steche. Aber wösse der was, houptsach es get 10ni u die si am Friitig auso zäi gsi. Osser sBethli wo eis zähni nachem andere gha hett ir Sektion u es super Resultat vo 92 gschosse hett, gratuliere.

I ha no dLiegendmeischterschaft fertig gschosse, nachdemm i am 29gischte gottströflech verseit ha ir 2-Stelligsmeischterschaft. Deför hetts de liegend glängt.

Am Mettag si doch aui relativ gschluchet rechtig Schlossbärg gwanderet u hend agstosse zäme uf die chliine u grosse Erfouge.

Friitig, 16.07.2010 (Motto: letschti Glägeheit)

Es esch de letschti Friitig gsi zom as Eidgenössische go zom fertig Schiesse för eusi Lüüt. Muess gloub ned erwähne dass es weder gheisse hett, früeh zo de Fädere us!

Es hend aui fertig möge am Friitig, die einte früecher die andere spöter. Gwössi hei no problem gha met em Abzog u anderi hei sösch zkämpfe gha, ou wenns met sech säuber gsi esch :)

sVreni hetts lang säuber ned chönne gloube. Aber si hett effektiv 94 ir Sektion gschosse. Wo si ufgstande esch hett sis ned realisiert. Mer henderes zwar gseit.
De öppe e Stond spöter hett sis de wörkli gloubt u hett sehr freud gha. Mer natürli ou,
ganz härzlechi Gratulation

De Didi hett met ach u krach ou no dLiegendmeischterschaft fertig gschosse u hett die grossi gmacht! Gratuliere, Didi es geit jo! Muesch nome a di gloube!!

Ou dä Tag hett de sis ändi gno. Am Schloss esch ou festgstande dass mer es super Sektionsresultat met 93.33 Schnett gschosse hei! Gratulation för die super Leischtig.

För üüs aui esch es ganz es erfougriichs Schötzefescht gsi. Merci a aui wo si metcho u das Fäscht hei so onvergässlech gmacht.

Brecht: Kaja Nussbaum alias Müüsli

A dere Stöu a aui Häufer, Fahrer u Organisierer es ganz grosses Dankeschön. Es esch ned säubverständlech dass der aui so vöu Ziit inveschtieret! Ohni das gohts imene Verein ned!

Wär sösch no met wett wösse vo anere Sektione u Persone cha onder www.shoot.ch aues go nocheläse.